म्याग्दी । अविरल वर्षाका कारण म्याग्दी जिल्लामा पहिरो गई एक दम्पतीको ज्यान गएको छ। धौलागिरि गाउँपालिका वडा नं. ७ ताकममा पहिरोले घर पुरिँदा तुलप्रसाद र उनकी श्रीमती बालकुमारी न्यौपानेको मृत्यु भएको ताकम प्रहरीचौकीका प्रहरी सहायक निरीक्षक रमेशप्रसाद अधिकारीले जानकारी दिए।
स्थानीय जनप्रतिनिधि, प्रहरी र स्थानीयवासीले तत्काल उद्धार कार्य गरेका थिए।
यसैबीच, लगातारको वर्षाका कारण म्याग्दी, राहुघाट र कालीगण्डकी नदीहरूमा पानीको सतह उल्लेख्य रूपमा बढेको छ। जल तथा मौसम विज्ञान विभागले म्याग्दी नदीको जलस्तरले सतर्कता तह पार गरेको र अझै बढ्दो क्रममा रहेको जानकारी दिएको छ।
विभागले नदी किनारका बासिन्दाहरूलाई विशेष सतर्कता अपनाउन अनुरोध गरेको छ। स्थानीय प्रशासनले पनि बाढी र पहिरोको जोखिम भएका क्षेत्रका बासिन्दाहरूलाई सुरक्षित स्थानमा सर्न आग्रह गरेको छ।
