इटहरी | इटहरीमा तीव्र गतिमा रहेको मोटरसाइकलको ठक्करबाट एक वृद्धाको मृत्यु भएको छ । सोमबार साँझ ६ बजेर ५० मिनेटमा इटहरी १ पीपल चौकस्थित कोसी राजमार्गमा धरानबाट इटहरीतर्फ आउँदै गरेको प्र १–०२–०४० प ४४८३ नम्बरको मोटरसाइकलले ठक्कर दिँदा वृद्धाको मृत्यु भएको हो ।
मृत्यु हुनेमा इटहरी २ बस्ने ७८ वर्षीया चन्द्रकुमारी बोहोरा रहेकी छन् । दुर्घटनामा गम्भीर घाइते भएकी उनको उपचारको क्रममा विराट टिचिङ अस्पताल विराटनगरमा सोमबार राति ८ बजेतिर मृत्यु भएको इलाका प्रहरी कार्यालय इटहरीले जनाएको छ ।
पैदलयात्री रहेकी वृद्धाको तीव्र गतिमा रहेको मोटरसाइकलले ठक्कर दिँदा मृत्यु भएको प्रहरीको प्रारम्भिक अनुसन्धानबाट खुलेको छ । सोही मोटरसाइकलकको ठक्करले मृतकका छोरा ५८ वर्षीय गोविन्दबहादुर बोहोरा घाइते भएका छन् । उनको विराट टिचिङमै उपचार भइरहेको छ ।
मोटरसाइकल चालक तत्काल फरार रहेकाले खोजतलास भइरहेको प्रहरीले जनाएको छ ।
