मकवानपुर । मकवानपुरको हेटौंडा-१७ हटियाको कठाएत चोकमा सवारी दुर्घटना भएको छ । बुधबार बिहान हेटौंडा बजारबाट ठूलदमार जाँदै गरेको बा ६४ प ६६६४ नम्बरको मोटरसाइकल र विपरित दिशाबाट आएको बा प्र ०३–०५ प ७११ नम्बरको स्कुटर एकआपसमा ठोक्किदा दुर्घटना भएको हो ।
दुर्घटनामा दुईजनाको मृत्यु भएको छ भने दुईजना घाईते भएका छन् । दुर्घटनामा मोटरसाइकल चालक हेटौंडा-१८ भालुखोलाका १८ वर्षीय अर्जुन भोम्जनको मृत्यु भएको छ । दुर्घटनामा गम्भीर घाइते भएका उनलाई उपचारको लागि हेटौंडा अस्पतालमा ल्याउँदा डाक्टरले मृत घोषणा गरेका थिए ।
स्कुटर चालक नुवाकोट ककनी नगरपालिका-४ की अन्दाजी २८ वर्षीया जीना लामाको भने उपचारको क्रममा मेडिकल कलेज भरतपुरमा मृत्यु भएको प्रहरीले जानकारी दिएको छ ।
दुर्घटनामा घाइते भएका मोटरसाइकलको पछाडी सवार हेटौंडा-१८ रामधुनीका १६ वर्षीय सुजन घलान र स्कुटरमा सवार बागमती-८ शान्तिपुरकी २४ वर्षीया ललिता थापामगरको उपचार भइरहेको प्रहरीले जनाएको छ ।
