काठमाडाैँ । नेपाल प्रिमियर लिग (एनपीएल) अन्तर्गत आज त्रिवि अन्तर्राष्ट्रिय क्रिकेट रङ्गशालामा दुई वटा खेल हुँदैछन्।
पहिलो खेलमा दिउँसो साढे १२ बजे विराटनगर किंग्स र जनकपुर बोल्ट्स आमनेसामने हुँदैछन्। यसअघि खेलेका तीन खेलमध्ये विराटनगरले एकमा जीत र दुईमा हार बेहोरेको छ भने जनकपुरले दुई खेल जित्दै एकमा हार बेहोरेको छ।
आजै हुने दोस्रो खेलमा बेलुका ५ बजे साविक विजेता लुम्बिनी लायन्स र पोखरा एभेन्जर्स आमनेसामने हुनेछन्। लुम्बिनीले यसअघि दुई खेलमध्ये एकमा जीत र एक खेल वर्षाका कारण अङ्क बाँडेको थियो। यता पोखरा भने आफ्ना सुरुवाती दुवै खेल हार व्यवहोर्दै पहिलो जीतको खोजीमा मैदान उत्रिनेछ।
नेपाल क्रिकेट सङ्घको आयोजनामा भइरहेको आठ टोली सहभागी तेस्रो संस्करणको एनपीएल आगामी मङ्सिर ५ गतेसम्म चल्नेछ।
