मकवानपुर । आज (सेप्टेम्बर ३०) ‘विश्व स्कुल दूध दिवस’ विभिन्न कार्यक्रम गरी मनाइँदै छ। विद्यालयमा दूधको महत्त्वबारे चेतना फैलाउने र बालबालिकालाई दूध सेवनमा प्रोत्साहन गर्ने उद्देश्यले हरेक वर्ष सेप्टेम्बरको अन्तिम बुधबार यो दिवस मनाउने गरिन्छ।
यस वर्ष “बलियो हड्डी, बलियो शरीर खेलकुद र विकासका लागि दूध अमूल्य आधार” भन्ने नारा तय गरिएको छ। दिवसका अवसरमा नेपाल डेरी एसोसिएसनले बालबालिकाको पोषण सुधार र किसानको दूध बजार विस्तारका लागि राष्ट्रिय विद्यालय दूध कार्यक्रम सञ्चालन गर्न माग गरेको छ।
एसोसिएसनका अनुसार विद्यालय दूध कार्यक्रमले बालबालिकालाई स्वस्थ राख्न सहयोग पुर्याउनुका साथै किसानको उत्पादनले सहज बजार पाउनेछ। यसले स्थानीय दुग्ध उद्योगको प्रवर्द्धन, रोजगारी सिर्जना र समग्र आर्थिक गतिविधिमा सकारात्मक असर पुग्ने विश्वास लिइएको छ।
संयुक्त राष्ट्रसङ्घको खाद्य तथा कृषि सङ्गठन (FAO) को आह्वानमा सन् २००० देखि विश्वभर यो दिवस मनाउन थालिएको हो।
