मकवानपुर | मकवानपुर जिल्लाको बकैया गाउँपालिकास्थित कान्तिलोकपथ सडकखण्डमा आज बिहान सवारी दुर्घटना हुँदा ३ जना गम्भीर घाइते भएका छन्।
जिल्ला प्रहरी कार्यालय मकवानपुरका प्रवक्ता लक्ष्मी भण्डारीका अनुसार बिहान साढे ७ बजेको समयमा ललितपुरबाट हेटौँडातर्फ आउँदै गरेको ग ३ च ९४७५ नम्बरको टाटा कार अनियन्त्रित भई सडकबाट करिब ५०० मिटर तल खसेको थियो।
घटनास्थलबाट प्रहरी चौकी ठिङ्गनको टोलीले तीनै जना घाइतेलाई उद्धार गरी उपचारका लागि अस्पताल लगेको छ। घाइतेहरूमध्ये एकजना बारा निजगढ नगरपालिका ६ बस्ने करिब ३० वर्षीय सन्दिप शाहको टाउकोमा चोट लागेको छ।
अर्का घाइते रौतहट मौलापुर नगरपालिका ६ बस्ने करिब १७ वर्षीय विवेक शाहको टाउको र शरीरको विभिन्न भागमा चोट लागेको छ भने मकवानपुरकै भिमफेदी गाउँपालिका ८ बस्ने करिब ६५ वर्षीय प्रेम बहादुर ब्लोनलाई पनि टाउको र शरीरको विभिन्न भागमा चोट लागेको छ।
घाइतेहरूलाई उपचारका लागि हेटौडा अस्पताल लगिएको प्रहरीले जनाको छ ।
