हेटौंडा | हेटौंडा उपमहानगरपालिका वडा नं. ९ लाई बालमैत्री स्थानीय शासनयुक्त वडा घोषणा गरिने भएको छ। यस घोषणासँगै वडा निकृष्ट बालश्रम मुक्त र बालविवाह मुक्त क्षेत्रको रूपमा मान्यता प्राप्त गर्नेछ।
सोमबार आयोजित पत्रकार सम्मेलनमा वडाध्यक्ष सुकराम केसीले वडाले नेपाल सरकारले तोकेको ५१ सूचकहरूमध्ये ४७ सूचकहरूमा १०० प्रतिशत उपलब्धि हासिल गरिसकेको बताएका छन् । जसमा बालश्रम, बालविवाह, र बालअधिकारको संरक्षणका लागि अपनाइएका नीतिहरूको सफल कार्यान्वयन रहेको उनको भनाई थियो । बाँकी सूचकहरूमा पनि उल्लेखनीय प्रगति भएको बताइएको छ।
वडामा हाल २७ सय ७ जना बालबालिका रहेका छन्, जसका लागि २५ वटा बालसमूह, १ वडा बाल सञ्जाल गठन गरिएको छ । घोषणा समारोह आश्विन ११ गते श्री प्रगति माविको प्राङ्गणमा आयोजना गरिने अध्यक्ष केसीले बताए ।
यस घोषणाले वडामा बालबालिकाका लागि सुरक्षित, स्वस्थ, र समावेशी वातावरण निर्माणमा मद्दत गर्ने र स्थानीय शासनलाई थप सुदृढ बनाउने विश्वास गरिएको छ।
