बेनी | म्याग्दीमा सवारी दुर्घटनामा एक जनाको मृत्यु भएको छ। जिल्लाको अन्नपूर्ण गाउँपालिका–७, टिकोटमा बुधबार बिहान बेनीतर्फ आउन लागेको ग १ ज ७९४५ नम्बरको बोलेरो जिप भिरालो सडकबाट पछाडि गुडेपछि भिरबाट खसेको हो।
दुर्घटनामा गम्भीर घाइते भएका सोही गाउँका ६४ वर्षीय भीम बहादुर पाइजा पुनको उपचारको लागि बेनी अस्पताल ल्याइएको थियो। करिब १ बजे उनको बेनी अस्पतालमा मृत्यु भएको जिल्ला प्रहरी कार्यालय म्याग्दीले जनाएको छ। उनको अनुहार र टाउकोमा चोट लागेको जिल्ला प्रहरी कार्यालय म्याग्दीका सूचना अधिकारी राजन रायमाझीले जानकारी दिए ।
रोकेर राखिएको जिप पछाडिपट्टि चिप्लिएर गुडेर सडकदेखि करिब पचास मिटर तल खसेको थियो। सोही दुर्घटनामा सामान्य घाइते भएका सोही वडाका ४१ वर्षीय कुमार पुनको बेनी अस्पतालमा उपचार भइरहेको छ भने सोही वडाका चालक ३६ वर्षीय केशव पुनलाई प्रहरीले नियन्त्रणमा लिएको जनाएको छ। सोही वडाका ७१ वर्षीय वीरबहादुर पुन सामान्य घाइते भएका छन् ।
