तराई क्षेत्रमा ४० डिग्री देखि ४५ डिग्री सम्म तापक्रम पुग्ने गरेकाले इटहरी उपमहानगरपालिकाले शिक्षण संस्थाहरू दुई दिनका लागि बन्द गर्ने निर्णय गरेको छ । गर्मीले जनजीवन नै अस्तव्यस्त हुन थाले पछि बिदा दिइएको उपमहानगरपालिकाले जनाएको छ ।
बढ्दो गर्मीका कारण बालबालिकाहरूको स्वास्थ्यमा प्रतिकूल प्रभाव परेको भन्दै इटहरी उपमहानगरपालिकाले जेठ भोली र पर्सी सबै सामुदायिक र संस्थागत विद्यालय बन्द गर्ने निर्णय गरेको हो ।
इटहरी उपमहानगरपालिकाले गर्मी बिदा दिएको खुसी भएको विद्यार्थी गोरब खड्काले बताए । गर्मीले गर्दा बिदा भएकाले सहज हुने उनको भनाइ थियो । त्यस्तै, विद्यार्थीहरूलाई पढ्नमा समस्या भएकाले बिदा दिएको निर्णय राम्रो भएको शिक्षक मणिकुमार पौडेलले बताए ।
अत्यधिक गर्मीले यस क्षेत्रको जनजीवन कष्टकर बनेको भन्दै बिदा दिएको इटहरीका नगर प्रमुख हेमकर्ण पौडेलले जानकारी दिए । बालबालिकाहरू समस्यामा परेको कारण बिदा दिएको प्रमुख पौडेलले बताए।
गर्मीले गर्दा विद्यार्थी मात्र नभएर बालबालिका,वृद्ध वृद्धा, पैदल यात्रु, मजदुर, व्यापारिक क्षेत्रलाई समेत प्रभावित बनाएको छ । केही दिन अघि झापामा दुई जनाको मृत्यु भएको थियो ।
