काठमाडाैँ । उद्योग, वाणिज्य तथा आपूर्तिमन्त्री दीपककुमार साहले ग्यास र पेट्रोलियम पदार्थको आपूर्ति नेपालको नियन्त्रणभन्दा बाहिर रहेको बताएका छन्। अन्तर्राष्ट्रिय भू-राजनीतिक द्वन्द्वले आपूर्ति प्रणालीमा असर पारेकाले तत्काल ऊर्जा र कृषि क्षेत्रमा आत्मनिर्भर हुने नीति लिनुपर्ने उनको भनाइ छ।
संसद्को उद्योग तथा वाणिज्य र श्रम तथा उपभोक्ता हित समितिको बैठकमा बोल्दै मन्त्री साहले युक्रेन-रुस तथा मध्यपूर्वको द्वन्द्वका कारण इन्धन आपूर्ति प्रभावित भएको बताए। बाह्य वस्तुमाथिको निर्भरता घटाउन परम्परागत इन्धनको विकल्प खोज्ने समय आएको उनले स्पष्ट पारे।
मन्त्री साहका अनुसार आपूर्ति व्यवस्थालाई सहज बनाउन र नागरिकलाई स्वदेशी स्रोतको प्रयोगतर्फ उत्प्रेरित गर्न सञ्चारमाध्यमको भूमिका महत्त्वपूर्ण हुन्छ। उनले कृषि उत्पादनमा जोड दिँदै पहाडी क्षेत्रका रैथाने बालीको प्रवर्द्धन गर्न आवश्यक रहेको बताए।
ग्यास आपूर्तिबारे सांसदहरूले सोधेका प्रश्नको जवाफ दिँदै मन्त्री साहले स्वदेशी उत्पादन र आन्तरिक ऊर्जाको प्रयोगले मात्रै आपूर्ति समस्याको दिगो समाधान दिने दोहोर्याए।
