हेटौँडा | हेटौँडा उपमहानगरपालिकाकी प्रमुख मीनाकुमारी लामाले नागरिकप्रति उत्तरदायी नहुने राज्य संरचना दीर्घकालीन रूपमा टिक्न नसक्ने स्पष्ट टिप्पणी गरेकी छिन्।
हेटौँडा खानेपानी व्यवस्थापन बोर्डको १२औँ वार्षिकोत्सवमा बोल्दै नगरप्रमुख लामाले विकास निर्माण र सेवा प्रवाहमा गम्भीरता, पारदर्शिता र समन्वय अपरिहार्य भएको बताइन्। “राज्यका संरचनाहरूले जनअपेक्षा अनुसार जिम्मेवारीका साथ काम नगरे धरासायी हुनेछन्,” उनले भनिन्।
उनका अनुसार हेटौँडा उपमहानगरपालिकाले विपन्न वर्गका नागरिकलाई न्यूनतम महसुलमा सुरक्षित र भरपर्दो खानेपानी सेवा दिन बोर्डमार्फत सक्रिय पहल गरिरहेको छ। खानेपानीको दीर्घकालीन व्यवस्थापनका लागि संघ र प्रदेश सरकारसँग सहकार्य गर्दै स्रोत पहिचान र संरचना निर्माणमा काम भइरहेको पनि उनले जानकारी दिइन्।
कार्यक्रममा बोर्ड अध्यक्ष प्रताप विष्टले हाल हेटौँडामा खानेपानी आपूर्ति सहज बनाउन रिचार्ज पोखरी निर्माणदेखि स्रोत व्यवस्थापनसम्मका योजनाहरू अघि बढाइएको बताए।
