मकवानपुर । नेपालबाट मनसुन बाहिरिने क्रम सुरु भए पनि आगामी दिनमा वर्षाको गतिविधि थप बढ्ने मौसमविद्हरूले बताएका छन्। बङ्गालको खाडी र अरब सागरबाट जलवाष्पयुक्त वायु भित्रिरहेकाले घटस्थापनाको अघिल्लो दिनसम्मै देशका अधिकांश स्थानमा वर्षा हुने सम्भावना छ।
त्रिभुवन विश्वविद्यालय जल तथा मौसम विज्ञान केन्द्रीय विभागका सहप्राध्यापक डा. विनोद पोखरेलका अनुसार आजदेखि असोज २१ गतेसम्म वर्षाको प्रभाव बढी रहनेछ। असोज २० गते पहाडी भूभागका धेरै ठाउँमा र २१ गते पूर्वदेखि पश्चिमसम्मै व्यापक वर्षाको आकलन गरिएको छ। २१ गते सुदूरपश्चिम प्रदेशका एक-दुई स्थानमा भारी वर्षाको समेत सम्भावना रहेको उनले बताए।
मौसम पूर्वानुमान महाशाखाका मौसमविद् माधवी सिग्देलका अनुसार आगामी तीन दिनसम्म देशका विभिन्न भागमा छिटपुटदेखि मध्यम वर्षा जारी रहनेछ। विशेषगरी पश्चिमी भूभागमा वर्षाको गतिविधि बढ्ने सम्भावना छ।
आज दिउँसो काठमाडौँ उपत्यकासहित पहाडी तथा हिमाली भूभागका थोरै स्थान र तराईका केही स्थानमा मध्यम वर्षाको सम्भावना छ। यसैगरी मधेश, कोशी, बागमती र गण्डकी प्रदेशका तराई भूभागका थोरै स्थानमा वर्षा हुनसक्ने महाशाखाले जनाएको छ।
विगत २४ घण्टामा कर्णालीदेखि कोशी प्रदेशसम्मै वर्षा दर्ज भएको छ। खासगरी कोशी, मधेश, गण्डकी र लुम्बिनीका केही स्थानमा मध्यमदेखि भारी वर्षा भएको जल तथा मौसम विज्ञान विभागले जनाएको छ। दशैँको घटस्थापनाका दिन भने पानी पर्ने क्रम केही घट्ने मौसमविद्को अनुमान छ।
